EPRDF is a ruling party committed to realize Ethiopia's Renaissance.

Friday, 2 November 2018

ጀግኒት! ከማጀት እስከ አደባባይ


በኤፊ ሰውነት
ከጥንት ከጠዋቱ የአገር ምሰሶ የቤት አለኝታ ሴት ናት፡፡ በባህልና ወግ ተጠፍንጋም ሴት ለቤቷ መሰረት ናት፡፡ ትዳር አጋሯን ጨምሮ ቁጥራቸው ይነስም ይብዛም ልጆቿን እንደአመላቸው አቅፋ ለወግ የምታበቃው ሴት ናት፡፡ የሴቶች ሁሉ ቁንጮ የሆኑት እቴጌ ጣይቱን ጨምሮ አገራችን በወጣቻቸው እና በወረደቻቸው አባጣ ጎርባጣዎች ሁሉ የአገራችን ሴቶች ግምባር ቀድም ተሳታፊዎች ነበሩ፡፡ ደጀን ከመሆን ራስን በጦር ግምባር እስከመማገድ የደረሰ ብስለትና ብቃታቸውን በተግባር አሳይተዋል፡፡

Tuesday, 9 October 2018

በታሪካዊ ምዕራፍ የተካሄደ ታሪካዊ ጉባዔ


ከኤፊ ሰውነት
ሰሞኑን የበርካቶች ቀልብ ሀዋሳ ላይ ነበር፡፡ ከፍተኛ የመንግስት ኃላፊዎች፣ የፓርቲ አመራሮች፣ ታዋቂ ሰዎች፣ የውጭ ሀገራት ልዑካን ወዘተ ሀዋሳ ላይ ከትመዋል፡፡ በርካታ የሀገር ውስጥና የውጭ ሀገራት የመገናኛ ብዙኃንም የብዝኃነት ተምሳሌት በሆነው በደቡብ ብሔሮች፣ ብሔረሰቦችና ህዝቦች ክልል ዋና ከተማ ሀዋሳ ቀድመው ተገኝተዋል፡፡ የዚህ ሁሉ ስብስብ ዋና ዓላማ 11ኛው የኢትዮጵያ ህዝቦች አብዮታዊ ዴሞክራሲያዊ ግንባር (ኢህአዴግ) ድርጅታዊ ጉባዔ ለመታደም ነው፡፡

ሀገራችን በፈጣን የለውጥ ሂደት ውስጥ ባለችበት በአሁኑ ወቅት በአንዳንድ አካባቢዎች እየተፈጠሩ ያሉ ችግሮችን እልባት የሚሰጥ አቅጣጫ ይቀመጣል የሚል እምነት በሁሉም ላይ አድሯል፡፡ ከዚህ በተጨማሪም የኢህአዴግ እህት ድርጅቶች አንድነታቸውን ይበልጥ አጠናክረው ይወጣሉ የሚልም የብዙዎች ተስፋ ነበር፡፡ በአጠቃላይ ጉባኤው የሚያሳልፋቸው ውሳኔዎች በብዙዎች ዘንድ በጉጉት እንዲጠበቅ አድርጎታል፡፡

ከመስከረም 23-25 ቀን 2011 ዓም ‹‹ሀገራዊ አንድነት ለሁለንተናዊ ብልጽግና›› በሚል መሪ ቃል የተካሄደው የኢህአዴግ ድርጅታዊ ጉባዔም እንደከዚህ ቀደሙ ሁሉ ኢህአዴግ አገራችንን ወደፊት ማሻገር የሚችልበት አቅም ገንብቶ የወጣበት፤ አመራሩም ቃሉን ያደሰበት መድረክ ነው፡፡ ጉባዔው የለውጡ ትሩፋቶች የሚጠናከሩበት ሁኔታ ላይም መክሯል፡፡ የተጀመረውን ፈጣን ልማት ማስቀጠል የሚቻልበት ሁኔታ ላይም ትኩረት ሰጥቶ ተወያይቷል፡፡ የህግ የበላይነትን ለማስከበር የሚያስችሉ እርምጃዎች እንዲወሰዱ አጽንኦት ሰጥቷል፡፡

የኢህአዴግ ድርጅታዊ ጉባኤ በተለይ የዜጎች ከቦታ ቦታ ተንቀሳቅሶ የመስራት ህገ መንግስታዊ መብት እንዲከበር መስራት ቅድሚያ የሚሰጠው ተግባር መሆኑ በጥልቀት ተመልክቷል፡፡ የስራ አጥነት ጉዳይ ጊዜ የማይሰጥ በመሆኑ በተለይም ለወጣቶች የስራ እድል ማስፋት እንደሚገባ አመላክቷል፡፡ ብሔረሰባዊ ማንነት ማክበር እንደተጠበቀ ሆኖ የሀገራችን አንድነት ለማስጠበቅ የሚያስችሉ ስራዎች ለማከናወንም መግባባት ላይ ደርሷል፡፡

ጉባኤ ባለፉት ጥቂት ወራት እንደአገር የመጡ ለውጦች ከፍተኛ ቦታ የሚሰጣቸው መሆኑን የተመለከተ ሲሆን ለዚህ ደግሞ የኢህአዴግ ሊቀመንበርና የኢፌዴሪ ጠቅላይ ሚንስትር ዶ/ር አብይ አሕመድ ውሳኔዎች መሬት እንዲነኩ ቆራጥ አመራር በመውሰድ የራሳቸውን ሚና መወጣታቸውን አስምሮበታል፡፡

ጉባኤተኛው ዴሞክራሲያዊ በሆነ መንገድ መስተካከል አለባቸው ይሄ የእኛ ክፍተት ነው ያላቸውን ነጥቦች በሙሉ በማውጣት ውይይት እንዲደረግበት አድርጓል፡፡ በየደረጃው የሰብዓዊ መብት፣ የህግ የበላይነት፣ የፌዴራሊዝም ስርዓት አፈፃፀም፣ የልማትና መሰል ጥያቄዎች በጉባኤተኛው ያለ ገደብ ቀርበው ውይይት ተደርጎባቸዋል፡፡ ጉባኤው በእህት ድርጅቶች መካከል ያለውን መጠራጠር ያጠበበ ነው ማለትም ይቻላል፡፡

ጉባዔተኛው በአገራችን እዚህ እዚያም የሚስተዋሉ አንዳንድ ችግሮችን በመፍታት የአገራችንን ልማት ማፋጠን እንደሚገባም አስምረውበታል፡፡ የኢህአዴግ ድርጅታዊ ጉባዔ በሀዋሳ ስታዲየም በርካታ የአካባቢውና የአጎራባች አካባቢ ነዋሪዎች በተገኙበት በሲዳማ የባህል ጭፈራና የምስጋና ስነስርዓት ተጠናቋል፡፡ የሲዳማ አባቶችም የቄጤላ ስነስርዓት በማካሄድ ምስጋናቸውንና አክብሮታቸውን ገልፀዋል፡፡  

ቄጤላ የሲዳማ ሽማግሌዎች የሚጫወቱት ጨዋታ ስርዓት ወይም የጨዋታው ስያሜ ነው፡፡ ሽማግሌዎች ግጥም እየደረደሩ ያሞግሳሉ፡፡

አብይ ዳኤ ቡሹ
አብይ አህመዲ ቤቶ ዳኤ ቡሹ
አብይ ባጢሉ ቤቶ
አብይ ሲዳማ ባጣኖ፡፡ ሲዳሙ አብይ ባጣኖ
አብይ ኢትዮጵዩ ማኒ በጣኖሲ
በማለት አብይ የአህመድ ልጅ እያሉ አክብሮታቸውን ገልፀዋል፡፡ አብይ ሲዳማን ይወዳል ሲዳማም አብይን ይወዳል፣ አብይ ኢትዮጵያን ይወዳል እያሉ በፍቅር አዚመዋል፡፡ …..ዳኤ ቡሹ እያሉ ያላቸውን አክብሮትም ገልፀዋል፡፡

በ11ኛው የኢህአዴግ ድርጅታዊ ጉባኤ ማጠቃለያ ላይም የሲዳማ አባቶች ፍቅርን ሰብከዋል፡፡ መልካም ምኞትና ጸሎታቸውንም አድርሰዋል፡፡ በአጠቃላይ የኢህአዴግ ጉባኤ ግቡና ያሳካና ታሪካዊ ነበር፡፡ ለነገ ስንቅ የሚሆኑ ውሳኔዎችን የተላለፉበት ለጋራ ጎጆአችን በጋራ ለመትጋት ቃል የተገባበትም ነው፡፡

ሀገራች በአዲስ የታሪክ ምዕራፍ ውስጥ ባለችበት በአሁኑ ወቅት የተካሄደው ይሄ ታሪካዊ ጉባዔ ነገን የተሻለ ለማድረግ የሚያስችሉ ወሳኝ ውሳኔዎች የተላለፉበት ነው፡፡ ለጉባዔው ውሳኔዎች መተግበር ደግሞ ሁሉም ሀላፊነቱን መወጣት አለበት፡፡ ይህ ሲሆን የሀገራችንን ከፍታ በአስተማማኝ ሁኔታ ማረጋገጥ እንችላለን፡፡

Saturday, 25 August 2018

ለውጡ በነውጥ ሴራና ለእኩይ ተግባር በሚሰራጭ ገንዘብ ሊገታ አይችልም!!


በአሁኑ ጊዜ በሀገራችን ኢትዮጵያ ለዘመናት ስር ሰዶ የቆየው የጥላቻና ቂም በቀል የፖለቲካ ምዕራፍ የሚዘጋበት፤ በምትኩ የይቅርታ፣ የፍቅርና የአብሮነት ፖለቲካዊ ሁኔታ የሚፈጠርበት ስር ነቀል የለውጥ ጉዞ ተጀምሯል። ይህ ሀገራዊ የለውጥ ጉዞ በሀገራችን ኢትዮጵያ ታሪክ ለመጀመሪያ ጊዜ የታየ፤ በአይነቱም ሆነ በይዘቱ በእጅጉ የተለየና መላውን የሀገራችንን ሕዝቦች በተስፋና በአንድነት ጎን እንዲሰለፉ ያደረገ ነው።
የለውጥ ጉዞው በአጭር ጊዜ ሀገራችንን ገጥሟት ከነበረው ያለመረጋጋት እና የሰላም እጦት የታደጋት ከመሆኑም ባሻገር በሕዝቦቿ ዘንድ ተፈጥሮ የነበረውን የፍርሃትና የጥርጣሬ ስሜት በመግፈፍ ለዘመናት ተሸርሽሮ የነበረው ሀገራዊ አንድነታችን እንዲጠናከር ጉልህ ሚና ተጫውቷል።
ከዚህ በተጨማሪ ለውጡን በተግባር በመቀየር የሀገራችን ሕዝቦች ሲያነሱት የነበረውን የዴሞክራሲና ሰብዓዊ መብቶች አያያዝ ችግር ለመቅረፍ እንዲሁም የልማትና መልካም አስተዳደር ጥያቄዎችን ለመፍታት ምልዓተ ሕዝቡን ባሳተፈ መልኩ ሰፋፊ እንቅስቃሴዎች በመደረግ ላይ ይገኛሉ።
የተጀመረው ሀገራዊ ለውጥ በመላ የሀገራችን ሕዝቦች ዘንድ ከፍተኛ ተስፋ ያሳደረ ቢሆንም ከለውጡ የማይጠቀሙ ይልቁንም ጥቅማቸው በቀጥታ የሚነካ ኪራይ ሰብሳቢ ግለሰቦችና ቡድኖች ዛሬም ልክ እንደተለመደው በጥቅም በታወረ አስተሳሰብ የሀገርንና የሕዝብን ፍላጎት ወደ ጎን በመተውና ራሳቸውን ብቻ ማዕከል በማድረግ ለውጡን ለማዘግየት ከተቻላቸውም ለመቀልበስ ባለ በሌለ ሃይላቸው የአፍራሽ ሴራቸውን እያራመዱ ይገኛሉ።
ይህ ስብስብ ባለፉት ጊዜያት የመንግስት ስልጣንን ተጠቅሞ የብሔር እና የሕገ መንግስት ጭንብል ለብሶ የሀገር እና የሕዝብ ገንዘብ ሲዘርፍ የነበረና አሳፋሪ ተግባር ሲፈፅም የኖረ ስለሆነ የተጀመረው ለውጥ ተጠናክሮ ከቀጠለ የሰረቀውን እንዳይመልስና በህግ እንዳይጠየቅ ስለሚፈራ የተካነበትን እኩይ ተግባር ተጠቅሞ ለውጡን ለማጠልሸትና ብዥታዎችን ለመፍጠር እየሰራ ይገኛል። ይሁንና የተጀመረው ሀገራዊ የለውጥ ጉዞ በሕዝባችን ፍላጎት፣ ባለቤትነትና ሁለንተናዊ ተሳትፎ የሚካሄድ በመሆኑ ጥቂቶች በሚጠነስሱት የነውጥ ሴራና ለጥፋት በሚሰራጭ ገንዘብ ለአፍታም ቢሆን ሊገታ አይችልም።
የተጀመረውን ሀገራዊ የለውጥ ጉዞ አጠናክሮ የማስቀጠል ጉዳይ የመሪ ድርጅታችን ኢሕአዴግ፣ የሀገራችንና የሕዝቦቿ የህልውና ጉዳይ በመሆኑ ለውጡን ለማደናቀፍ የሚጣጣሩ ሃይሎች ከዚህ እኩይ ተግባር መቆጠብ የሚገባቸው ይሆናል። መላው የሀገራችን ሕዝቦችም በትግላቸው የጀመሩትን የለውጥ ጎዳና ያለእንከን ወደ ተሻለ ደረጃ ለማሸጋገር እያደረጉ ያሉትን ድጋፍ አጠናክረው መቀጠልና ይህን ለማደብዘዝ የሚጥርን ማንኛውም ተግባር በፅኑ መታገል ይኖርባቸዋል።

Wednesday, 22 August 2018

ለውጡን ማስቀጠል የሚያስችል ስብዕናን መገንባት ከራስ ይጀምራል






ከኤፊ ሰውነት
ያሳለፍናቸው ሁለትና ሶስት ዓመታት በርካታ ዋጋ ያስከፈሉ፤ በሰውና በንብረት ላይ ቀላል የማይባል ውድመት ያደረሱ አገራችንን በአስቸጋሪና አጣብቂኝ ሁኔታ ውስጥ ያስገቡ በጥቅሉ አገራችን ገደል አፋፍ ላይ ቆማ የነበረችበት ሁኔታ ነው የነበረው፡፡ እነዛ ጊዜያት አልፈው ዛሬ ላይ አገራችን ህዝቡ ሲያነሳው ለነበረው የለውጥ ጥያቄ ምላሽ መስጠት በሚቻልበት ምቹ ሁኔታ ውስጥ ትገኛለች፡፡ ህዝቡ ሲያነሳቸው ለነበሩ ጥያቄዎችም ምላሽ መስጠት ተጀምሯል፡፡ ሆኖም አገሪቱ በለውጥ ሂደት ውስጥ ሆናም በዜጎች ላይ የሚደርሰው የህይወትና የንብረት ውድመት መቆም አልቻለም፡፡ “ከክልሌ ውጣልኝ” የሚል ጸረ-ህገመንግስት የሆነ የለውጥ ሂደቱ ጎታችና አደናቃፊ አስተሳሰብ ማራመድ አልቀረም፡፡ አሁንም ዜጎች በአገራቸው ዘራቸው፤ እምነታቸው  እየተቆጠረ መፈናቀላቸው እና ለከፋ እንግልት እና ስቃይ መዳረጋቸው እንዲሁ አላቆመም እየተዳረጉ ነው፡፡ 


መነሻው ምን ይሁን ምን ዛሬም ድረስ አገራችን ላይ የተደቀነውን አደጋ ከስሜታዊነት በጸዳ መልኩ ቆም ብሎ በማሰብ እልባት እንዲያገኝ ማድረግ ይገባል፤ ይህም ለነገ የማይባል ትልቅ የህልውና ጉዳይ ከሆነ ሰነባብቷል፡፡ ግርግር ለቀማተኛ ይመቻል እንዲሉ ዛሬም በግርግር ሰበብ የንጹሀንን ህይወት የሚያጠፉ፤ አካል የሚያጎድሉ፤ የህዝብን ሃብት የሚዘርፉ፣ የሚያዘዋውሩ፤ የግለሰቦችን ሃብት ንብረት የሚያወድሙ ግለሰቦችና ቡድኖች ቀላል አይደሉም፡፡ በሀገራችን የተጀመረው የለውጥ ሂደት በርካታ ሃሳቦችን በማስተናገድ በአገራችን ከኤርትራ መንግስት ጋር ያለውን አለመግባባት በመፍታት ሰላማዊ ወደሆነ ሁኔታ ከመመለስ ጀምሮ በአገር ውስጥም የህግ ታራሚዎችን በይቅርታ በመፍታት በአገር ውስጥም በውጭም ያለው ኢትዮጵያዊ በአገሩ ነፃነት ተሰምቶት እንዲንቀሳቀስ የሚያደርግ አዲስ የለውጥ መንፈስ እንዲሰፍን ተደርጓል፡፡


Tuesday, 14 August 2018

ዲያስፖራው ለሀገሩ - ሀገር ለዲያስፖራው


 (በኪያ አባቢያ)
ቁጥሩ እየጨመረ ከሚገኘው የዓለም ህዝብ ውስጥ ከ210 ሚሊየን በላይ የህዝብ ብዛት ካላት የብራዚል ህዝብ ቁጥር የሚልቅ ህዝብ ከአገሩ ውጭ እንደሚኖር መረጃዎች ያመላክታሉ፡፡ ከአሜሪካ ህዝብ 8 በመቶ የሚሆኑት ትውልድ እና እድገታቸው ከተለያዩ አገራት የሚመዘዝ ነው፡፡ 11 ሚሊየን ህዝብ ከሚጠጋ የተባበሩት አረብ ኤምሬትስ ህዝብ ውስጥ 10 ሚሊየኑ ከሌሎች አገራት እንጀራን ፍለጋ የመጡ ስለመሆናቸው ይነገራል፡፡ ግለሰቦች አገራቸውን ጥለው ሌላ አገርን ለማማተር የሚገደዱት የፖለቲካ፤ ኢኮኖሚ አሊያም ማህበራዊ ችግሮች   ሲጋርጥባቸው ነው፡፡ የተማረም ሆነ ያልተማረ ዜጋ አገሩን ጥሎ ሲሰደድ ለአገሩም ሆነ ለተቀባዩ አገር ጫናና እና ክፍተት እንደሚፈጥር ሁሉ የተለያዩ እድሎችንም የሚፈጥር ነው፡፡

Wednesday, 18 July 2018

ፕራይቬታይዜሸን ለምን?




 በወጋገን አማኑኤል
የኢህአዴግ ሥራ አስፈፃሚ ኮሚቴ በቅርቡ መደበኛ ስብሰባውን ካካሄደ በኋላ በአበይት ጉዳዮች ላይ አቅጣጫዎችን ያስቀመጠ መሆኑ ይታወቃል:: ሰሞኑን የአገራችን አበይት አጀንዳ ሆኖ አለም እየተነጋገረበት ያለው የኤርትራና የኢትዮጵያ አዲስ የሰላም ግንኙነትን ጨምሮ የኢህአዴግ ስራ አስፈፃሚ ኮሚቴ ያስተላለፋቸው ውሳኔዎች መሬት እየያዙ እየሄዱ መሆኑን መመልከት ይቻላል፡፡ ከውሳኔዎቹ ውስጥ አንደኛው የሀገር ውስጥ ባለሃብቶች በሜጋ ፕሮጀክቶች ላይ የአክስዮን ድርሻ እንዲኖራቸውና በመንግስት ይዞታ ሥር ያሉ ድርጅቶች የባቡር፣ የስኳር ልማት፣ የኢንዱስትሪ ፓርክ፣ የሆቴልና የተለያዩ የማኑፋክቸሪንግ ድርጅቶች ሙሉ በሙሉ ወይም በከፊል በአክሲዮን ሽያጭ ወደ ግሉ ዘርፍ እንዲዘዋወሩ የተላለፈው ውሳኔ ነው፡፡ ይህን እንደ መነሻ በመወሰድ ስለ ፕራይቬታይዜሽን አንዳንድ ሃሳቦችን ማብራራት አስፈላጊ ነው፡፡ 

Monday, 16 July 2018

ከአስመራ እስከ አዲስ አበባ የተዘረጋ የማያረጅ የፍቅር ሸማ


                                                     


                                                                                             
                        በኤፊ ሰውነት

 "ተዛወሪ አውቶብሰይ ተዛወሪየ
አስመራ ሸዋ ኾይኑ መፋቐርየ፡፡
ኮሚደረ ፀቢሒ አቡንየ
ሰላምን ፍቐርን ዘይብሉ አይጥዕሙንየ፡፡
ተዛወሪ ነፋሪት ነፋሪትየ
አክሱም መቐለ ኾይኑ መፋቐርየ፡፡" 

ይህን በግርድፉ ወደአማረኛ ስናመጣው አውቶብሴ ዙሪ አስመራና ሸዋ ፍቅር ሆነዋልና፡፡ ሰላምና ፍቅር ከሌለበት የቲማቲም ወጥም አይጣፍጥም፡፡ አንቺ አውሮፕላን ዙሪ አክሱምም መቐለም ፍቅር ሆነዋልና የሚል ትርጉም አለው፡፡ ይህ ዜማ ድምፃዊ ዳዊት ሽላን የአገራችን ጠቅላይ ሚንስትር ዶ/ር አብይ አሕመድ የኤርትራ ጉብኝት ወቅት በነበረው በተደረገው የእራት ግብዣ ስነ-ሥርዓት ላይ ያዜመው ነበር፡፡ ዜማው እንኳን ከአጠገብ በዛው በኤርትራ ምድር ላይ ሆኖ ለሚሰማው ይቅርና በቴሌቭዥን መስኮት ሁነቱን ስንከታተል ለነበረው አንጀት ድረስ ሰርስሮ የሚገባ ዜማ ነበር፡፡ በእርግጥም ያ የፀብ ግድግዳ ተደርምሷል፡፡ የኢትዮጵያ እና የኤርትራ ሕዝብ ፍቅሩን አድሷል፡፡ ወንደማማች ሕዝቦች ፀብን ሳይሆን ፍቅርን፣ አብሮ ማደግን፣ አብሮ መልማትን፣ ሁለት ሉዓላዊ አገር ግን እንደ አንድ ትልቅ ሕዝብ ሆነው ወደፊት ለመራመድ ቃል የተገባቡት እለት ነው፡፡